اسعار ‏السيارات ‏اليومين ‏الجايين

في السنتين اللي فاتوا ...وتحديدا من ١ يناير ٢٠١٩ تم تطبيق اخر مرحلة من اتفاقية التبادل التجاري الاوروبية الحرة "الجات" مع اوروبا ....العربيات كلها رخصت بفضل القانون ده ....ولكن مع الوقت ظهر للاسف ظاهرة خطيرة جدا وهي ترديد الكلام الغير دقيق و "الموجه" لناس كتير ... ناس كتير عاوزة تجيب مشاهدات على اليوتويب  وفي ناس عاوزة تلم فولورز وخلاص على حساب مصالح الناس  وفي ناس عاوز تلم فلوس الناس لمصلحتها وتأسيس شركات وهمية كل ده بشكل غريب وعشوائي ....وياما اتكلمت في الموضوع ده ...وده وقت توضيح الحقائق بشكل عملي وسهل ... الاشاعات اللي ظهرت من سنتين ونتيجتها  ١- العربيات هترخص وتبقى زي الخليج واحسن ....النتيجة هي "لأ" في اغلب الموديلات ...خصوصا الموديلات اللي بتيجي بمحركات كبيرة السعة اللترية لان عندنا في مصر "ضرائب" اكتر ...وفي جمارك لسة على العربيات الغير اوروبية المنشأ. ٢- العربيات الهايبرد الالماني هتملى السوق المصري وهتنزل سعر العربيات البنزين العادية الجديدة لدى الوكلاء :.....الحقيقة ان ده على مدى سنتين محصلش ....كان بشكل محدود جدا لان العربيات الهايبرد بتيجي بمواصفات خاصة...ممكن مينفعش يبقى ليها ضمان ...والاهم انك بتستورد عربية "مشفتهاش" ولازم "كاش" او بقرض شخصي ...فالموضوع مش سهل ومش هينفع يغير شكل سوق السيارات ويغير الاسعار. ٣-ازمة كورونا نزلت مبيعات كل الشركات في العالم والدنيا واقعة ....الاسعار هتنزل وهنجيب العربيات ارخص وبتراب الفلوس .....ومتصدقوش "القبيضة" اللي بتقول عكس كدة ...الحقيقة ان مبيعات السوق المصري في ٢٠٢٠ زادت بنسبة ٤٠٪؜ عكس دول كتير ....والاسعار زادت في الاونة الاخيرة ...وبقى في اوفر برايس ....كل ده لان تحليل الناس على النت عشوائي وغير دقيق وناتج من ناس هاوية "مع كامل الاحترام ليهم" ...وفي بعضهم ليه اجندات خاصة ... ٤-الناس اللي بتصرخ على النت "متشتروش بأوفر برايس" هما هماهم نفس الناس اللي بتروح تشتري بأوفر برايس !! الحل هو نصيحة الناس بالتأني والتخطيط لشراء العربية الجديدة في فترة كافية و البحث عن حلول بديلة لو العربية عليها اوفر برايس ....والموضوع ده له قاعدة سهلة اوي ....هشرحها حالا ! بعد خبرة ١٥ سنة شغل في مجال الاعلام المتخصص في السيارات هقولكم مجموعة نصائح ثابتة تحل كل العك اللي فوق ده .... ١- السوق عرض وطلب .....الناس متشتريش....الاسعار تنزل .....يهجموا على الشراء  ....الاسعار تزيد ....نقطة ومن اول السطر ! ٢- اي عربية جديدة ....موبايل جديد ....اي سلعة في العموم....الناس مستنياها ....سعرها بيبقى غالي في الاول ....وبعد وقت الاسعار بتنزل ....والضغط بيخف عليها .....ده قانون السوق .....مش فيزياء ولا علوم صواريخ .....اي حد بيحاول يفهمك غير كدة بيحاول يشتغلك ... القوانين الجمركية والضريبة هي الوحيدة المسئولة عن التغيير الجذري في سعر العربيات ....المنافسة القوية بردوا بتفرق بس اقل شوية .... ٣-اي حد تشوفه بيهاجم عربية من غير ما بجربها لوقت كافي ....اعرف انوا بيقول كلام غير دقيق...او ليه مصلحة ....التجارب بتحتاج على الاقل اسبوع ....وكذا يوم علشان المونتاج ومراجعة الفيديو ....اما اللي بيتكلموا اساسا عن العربيات وهما مجربوهاش....او هواة مبيشتغلوش في مجال الاعلام ....غالبا كلامهم مش دقيق وغلط ....لانوا مبيسمعش "الطرفين"....لازم تسمع كلام ادارة الوكيل في مصر ....الشركة الام ....وراي العملاء ....غير كدة  الكلام ده كلام مرسل ....وهتلاقوه كل يومين بيتغير ....النهاردة العربية دي حلوة ....بكرة وحشة ....النهاردة السعر حلو ....بكرة السعر وحش ....وتبريرات وكلام مش موزون ....لان الهاوي بيعرف المعلومة بالصدفة وبشكل غير منظم .....او شركة لما تحضنه بيغير كلامه مرة واحدة على أمل الشغل معاها... اخر حاجة عاوز اقولها .... في السنتين اللي فاتوا صفحات كتير كانت بتشتمني....او بتسرق شغلي ....او بينشروا اكاذيب  الصفحات دي اغلبها "قفل" ....وهتلاقوا الادمينز على الصفحات بيقلولكم طول النهار ...تفاعلوا علشان الهجمات الالكترونية والبيتنجانية🤣 عاوزين يقفلوا الصفحة اللي بتنورلكم طريقكم ....الحقيقة ان فيس بوك بيقفل الصفحات اللي بتعمل الاتي: ١- بتسرق محتوى  ٢- بتسرق مازيكا ٣- بتشتم ناس  ٤-بتنشر اكاذيب اما شغل "بيهاجمونا" و "ريبورتا ت" وخلاص فده اي كلام ومش حقيقي علشان الناس دي تلم تفاعل .....